Hebrews 12

Iriꞌ Oꞌmariaꞌ Oꞌnoriaing Jiisuuꞌ Narung-koo Noruꞌ Sipampiri

1Bakei teing iriꞌ opariaꞌ Kumponing masikaꞌantavaakoꞌning aaꞌnaꞌ karinga deempariritaaꞌ teing kamoꞌ pankaing koromurimaung-pinaꞌ otorong. Teeꞌkoo enang teing niiꞌ iriꞌantamaarima teeꞌ oomaari otomaung-pinaꞌ noruꞌampira niiꞌke tee ookara mankiꞌnanka eeꞌnoko orakaꞌ nkonanka niiꞌkoo naꞌnampari daiꞌmuri otomaing sipampira danto nariꞌ iriꞌ oꞌmariaꞌ kuaꞌmariaing tee-koo deikooꞌkoo Kumponinge niiꞌkoo uroꞌkanooꞌka miruꞌuuꞌnung-koo. 2Otori Jiisuuꞌ narung-koo ookiri otorimaatoai, eeꞌnara niikaang masikaꞌanta okovenung eeꞌnoko dupe-antai. Aiꞌ tee tee dotuaravainaꞌ noruꞌui avaruꞌ tee sisikeera kuneꞌkoo aaꞌbarataꞌkoo; tee-koo maiaꞌkoo ampaꞌouꞌ; eeꞌnoko enang tee Kumponing-koo tampavine-koo baꞌnampari otong teꞌ tanata nkoroma.

Kumponinge Mankiꞌ Amurimanaꞌ Niiꞌ Koong-anta-koo

3Eeꞌnara eeꞌ noruꞌeriaing: nantoonge orenge tee orakaꞌ nkoaako tee baka avaruꞌ tee toraꞌkoo, diiꞌ teeꞌ orakaꞌ nkoraariko domang aruaruꞌdoriarooꞌnaang. 4Diiꞌ orara aarumo dimpaꞌkoo karirariko dupisiꞌdaariainooꞌ mmeꞌ basirariaꞌ. 5Eeꞌnoko diiꞌ ampaꞌdoruꞌning teeꞌ Kumponinge puring-antaruri tautaururuꞌnaꞌ baurukaaꞌ tanturi, Daari Meekunge aaꞌpumanooꞌka,

“Ee nnuring, Ovoringe koong-antaruma kakeꞌii-antaruko tee tamunsiꞌnung-pinaꞌ noruꞌema domang mankiꞌdoaukaꞌ. 6Aiꞌ Ovoringe tee koong-antavurimaung teing piaavurimaing, eeꞌnoko kiimatavurikooꞌ ookara baurukaaꞌ tampurimaing.”
(Mirumiruꞌ 3:11,12)

7Teeꞌkoo koong-anta-koo bakei tauraꞌdarimaatoai. Kumponinge tee baurukaaꞌpinaꞌ nkorurimaung, aiꞌ baa tee tootoꞌ baumai koong-antavuaung otong? 8Diiꞌ teie teeꞌ koong-antaruriarui dei ookutuning koong-antavurimanaꞌ diiꞌ teie baurukaaꞌ masikeng deentariarupeuꞌ, tamung auning-kooning-pinaꞌ otoripeuꞌ. 9Napoꞌ eeꞌ noruꞌeriai, niumatakaampi paramaaruꞌning otorong koong-antamaariko teing-koo arooꞌmarimaing, tee-koo Niuma-koo tanuaang-aapenung-koo ee niiꞌ deto basinooꞌ arooꞌmariarupeuꞌ domamuriaꞌnaang? 10Aiꞌ teinge niumatakaampie tee batei okiꞌnamuꞌkoo okiꞌnarekaꞌ deemariko koong-antamaarimaung teing-koo makosinaꞌ, teka teie Kumponinge deto basinooꞌ tampaꞌ oꞌnoriainaꞌ koong-antamurimaung baka makosi-antamurimanaꞌ nariꞌ meekupoong oꞌnoriiꞌnaang. 11Eꞌmunung bateinang-koo ookara koong-antananka tee sisikeera-poꞌning-pinaꞌ oroꞌparamang, tampaꞌ deeꞌanta-pinaꞌ deeaꞌ. Teketa damaꞌke koontoꞌnuka deemarira unaamori oꞌnoriaing niiꞌ baremarimaung-koo.

Aaꞌnaꞌ Purimariri Oꞌnoriai Kumponing Bakaang Piaa Beiꞌbeiꞌampiꞌneenga

12Teeꞌkoo Deto purintariai diikaang bireng aruaruꞌnanka eeꞌnoko miing taruaꞌnanka ivekaꞌdariai. 13Eeꞌnoko tampaꞌ koontoꞌnavunge nanirimaatoai niiꞌning diiꞌkoo miing taruaꞌnuka apaꞌdekoariꞌneenga, teka unaavoroi otoroai.

14Ookara nantoong ninka mooa-koo otoꞌkoo paarararimaatoai eeꞌnoko meekaꞌdariri otoꞌkoo. Naning meekaꞌparavaunge tee Ovoring oovuarupeuꞌ. 15Tarerariaing niiꞌnunge Kumponing bakaang piaa bekoiꞌuꞌneenga, niiꞌnamuriiꞌ ovoring siompui. Teeꞌ oroꞌ naning tonto doparopa-poꞌnung-pinaꞌ diiꞌkoo dupura orari-antaruriꞌneenga.

16Tarerariaing niiꞌnung naning manikuꞌ ninka bakiaaꞌ nkovuꞌneenga niiꞌnooꞌ Kumponing noruꞌuaruuꞌneenga Iiso-pinaꞌ, tee-pinaꞌ bakaang barenku meekung miruꞌniiꞌ baavevuuꞌnuung-pinaꞌ duu-koo daang-koo. 17Eeꞌnoko diiꞌke noruꞌeri otong damaꞌke nkoaruꞌnaꞌ tee biraanke barenku okovenung-pinaꞌ nka-koo piavoko Kumponinge tompimpuuꞌ. Taung paari-anta-koonaꞌ otoaruuꞌ bane taꞌdue duuꞌparuꞌ aaꞌnaꞌ besiꞌuma.

Niiꞌ Teing Teꞌ Jerusalemaꞌ Paning-koonooꞌ Tampooꞌ Morining

18Diiꞌ teing miinani-koo kong-koo makosinooꞌ deeaꞌnooꞌ otoring teeꞌ Isireeli-nupoong Sainai-namii-koo berouꞌnaꞌ aing aaꞌning mantompaama: 19ntaꞌ aaꞌnaꞌ urung, mutaanang tunumparavaung, doroviru, tuuviri-koong aurong, eeꞌnoko Kumponing-nung kara-koong aurong, eeꞌnung kara taaravaara avoreaama Moosesi nauauꞌ bakearaaꞌnaang, aaꞌpuko,

20“Baa tee naning amii kompuko deekoꞌ nantoonge kapange tooꞌpaama dupisiꞌaavaing, bane aremuriiꞌ, kauꞌ karenaumo deekoꞌ dupisiꞌaavainge.”
(Toro 19:12,13)

21Aaꞌnaꞌ avoꞌavoroꞌ oroꞌparako Moosesie aaꞌpuuꞌ,

“Ning aaꞌnaꞌ dankurankuꞌmarama amoromaang.”
(Boto 9:19)

22Eeꞌ, diiꞌ teing-pinaꞌ deeaꞌ kansiꞌkoong-koo miinani-koo berouꞌning-pinaꞌ; 23Teka diiꞌ meepoꞌ masipoꞌ Saioni-namii-koo poꞌnaꞌ porining, osi pankamono-koo Kumponing Domantooꞌ bakanamono-koo, teꞌ Jerusalemaꞌ paning-koonamono-koo, aing aaꞌning otoromanamono-koo: 24koosinunanka mmauꞌ deeru-paaꞌnanka naroꞌ uumunuariri~ aaꞌnaꞌ neraniiꞌnanka; Kumponing baurukaaꞌ kirokainku naroꞌariri dootuuꞌarimaing, paning-koo miring daariniiꞌnuka; Kumponing Eeꞌnara Kara-simpeꞌ ookara biikaang; eeꞌnoko teing nantoong tampeng dupe-antaniiꞌnuka biikaning tanuaananka; eeꞌnoko Jiisuuꞌ, tee Meuꞌnung nerakung kara naroong-anta-koong; eeꞌnoko tee ereng meekaꞌanta-koo miraꞌniiꞌnaruꞌ niiꞌ Kumponinge piaa-koong, Eebeloꞌ bakaang ereng-pinaꞌ deeaꞌ meroꞌ piavoma karouꞌnaruꞌ.

Teka Tampaꞌ Taremariri Oꞌnoriai

25Ooveri kupiꞌdoriaꞌ otoriaing taara-koo tee karomatomaung. Tenang Kumponinge kansiꞌkoonamii-etaꞌ tautauvuriko kupiꞌorora kiimata-ita mmariaavaruꞌnaꞌ ooverira noruꞌeriaing diiꞌ bakei aaꞌnaꞌ mmariꞌkoo makosinuka deeaꞌ tenang paning-eta tautaururiko beiꞌbeiꞌdariaing deekoꞌ. 26Bakaang auronge tee temuꞌnung batei-koo kansiꞌ biruꞌukoꞌ, teka enang tee maraka-antavari otong eeꞌ minkuvuma,

“Napoꞌ asiꞌnamuꞌke ninge dankampampaing kansiꞌ narung deeaꞌ, napoꞌ paning teeꞌ nariꞌke, ookeng.”
(Aakai 2:6)

27Anaare karanaare aaꞌpuinaare “Napoꞌ asiꞌnamuꞌke” tenaare eeꞌ miruꞌari otong: Teie tee kapooꞌ dankampuaing tee paaꞌaravaing, teing tamung nkovuuꞌning teie, teing kapooꞌ dankang-koo makosi deeaing biiꞌka bireꞌariri otoroainaꞌ.

28Teeꞌkoo niiꞌke tampaꞌ tampampimaatoaing tee paninung muuꞌ nkavampiruꞌnung-koo dankang-koo makosi deeaung; 29Teeꞌ nariꞌ Kumponing-koo makosinaꞌ dootuuꞌmarimatoaing meeꞌduꞌpimariri aaꞌnaꞌ amaiaaꞌmori, aiꞌ niikaang Kumponing tee ntaꞌ, ookara urusivumaung.